Wiridan

بسم الله الرحمن الرحيم

Dawuhan Alloh dina Al Quran:

{ يَا أَيُّهَا الَّذِينَ آٰمَنُوا اذْكُرُوْا اللهَ ذِكْرًا كَثِيرًا }

“He, eling-eling jalma nu ariman, Aranjeun kudu dzikir ka Alloh kalawan dzikir anu loba.” (QS. Al-Ahzab : 41)

Dzikir dina ilahar basa sunda disebut wirid/wiridan. Ari jalma anu keur dzikir lisanna, saperti maca tasbih, takbir, tahlil, maca sholawat, istighfar jeung sajabana aya tilu tingkatan :

1. Wiridan Mubtadi' (anu diajar deuheus ka Alloh),
2. Wiridan 'Abid (anu keur ibadah ka Alloh),
3. Wiridan Washil (anu keur mayun ka Alloh)

1. Wiridan Mubtadi'.
Ari mubtadi' nyaeta anu keur di ajar babacaan , diajar wiridan, dina niatna kubabacaannana hayang 'arodlol hayatid-dunya, hayang boga dunya, ngadu'a hayang dipasihan rizqi, wiridan jeung babacaannana kajurung ku pangabutuh masalah dunya, dina kaifiyyah macana teu kontak jiwa, lisanna norolang tapi henteu katuturkeun ku hate, anu dibacana henteu kajiwaan ku hatena, wiridna ukur lisanna wunngkul.
Biasana wiridan Mubtadi' mah tara angger, henteu istiqomah da tujuannana ge hayang hasil maksud. Atuh lamun geus hasil maksudna mah, lamun geus laksana sagala kahayangna mah wiridannana ge beres, tara dituluykeun.

2.    Wiridan 'Abid
Ari 'abid mah wiridanna henteu aya udang dibalik batu, teu hayang 'arodlol hayatid-dunya. Lain ngudag cita-cita jeung kahayang, tapi justru ibadah ku babacaannana, ngan hanjakal teu kajiwaan eusina, saperti budak anu keur diajar pidato, sanajan letahna norolang tapi henteu kajiwaan, henteu katuturkeun ku hate, ngomong kitu teh ngan ukur diajar, ladang ngapalkeun pedah apal. Wiridan anu kieu mah henteu katuturkeun ku hate, lamun dina hatena katumpangan ku hayang dunya jadi mubtadi' nu moal boga ganjaran di akherat. Tapi mun teu katarumpangan ku hayang dunya, tegesna ngudag ganjaran akherat, Insya Alloh bakal meunang ganjaran, ngan pedah kurang sampurna da henteu kajiwai eusina.

3. Wiridan Washil
Ari washil mah wiridannana aya kaifiyahna (cara) anu khusus, aya niatna. Niatna taqurrub ka Alloh, ngadeukeutkeun diri ka Alloh. Bari anu dibaca teh kaluar tina hate, naon anu dibaca geus kajiwai ku hatena.

Carana hayang nepi kana tingkat Washil nyaeta :
1. Kudu ngarti eusi anu dibaca,
2.  Muhadloroh, rasa deuheus ka Alloh minimal hatena dina tingkat Iman 'Ilmul Yaqin.
3. Takholli, ngosongkeun hate tina rodzail (kokotor hate), bari dibarengan ku khusyu’ rohani ka Alloh.

Urang moal bisa nepi kana tingkat washil lamun henteu takholli heula, sok sanajan apal kana harti anu di baca, ngarti kana eusina, tapi lamun hatena henteu kosong tina rodzail maol bisa nepi kana washilin. Sabab ari washilin mah heula keneh jiwa daripada babacaan, naon anu diucapkeun teh kaluar tina jiwa.
Lain babacaan anu dituturkeun ku hate, da nu kitu mah ngaranna haditsun nafsi, kereteg hate, nu kieu mah tacan nepi, ieu mah kakarak 'Abidin.

Tapi urang ulah tipoporos hayang muhadloroh jeung Alloh, da eta mah urusan Alloh, ngan lamun keur babacaan kudu diusahakeun kaluar tina hate, kudu dijiwai, alias khusyu’ hatena, Sanajan upama tea mah henteu nepi kana tingkat washilin, ari kana tingkat 'Abid mah nepi.

Diri ulah resep jeung betah calik dina mubtadi', paling handap cicing dina 'abid, malah kudu diusahakeun nepi kana washil. Ngan lamun henteu nepi, ulah tipoporose, tapi sakuatna, samampuna, nu penting mah ibadah ku macana sarta kajiwai eusina ku hate, keun henteu nepi kana washilin oge, ngan kudu ari khusyu’ mah.

Lamun diri hayang nepi kana washilin kudu mindeng babarengan jeung anu geus nepi kana washilin.


mutiarahikmah-uwakubaro.blogspot.in