Tengtrem Hate

بسم الله الرحمن الرحيم

Alloh ngadawuh dina Al Quran;

{ أَلَا بِذِكْرِ اللهِ تَطْمَئِنُّ الْقُلُوبُ }

"Sing inget, ku dzikir ka Alloh matak tengtrem hate".(QS. Ar Ro'd:30)

Dina raraga ngambah kahirupan di alam pawenangan loba kajadian anu kaalaman  ku diri sorangan, boh anu amis atawa anu pait, boh anu matak ngeunah atawa anu matak teu ngeunah. Pikeun anu imanna nepi kana arif mah eta kajadian teu matak mangaruhan kana jiwana, hatena tetep tengtrem adem ayem, betah rasa sanajan loba cocoba jeung gogoda. Ari anu matak mawa betah kana rasa jeung tengtrem hate teh dzikir ka Alloh.

Dzikir nu mana jeung eling nu mana anu matak nengtremkeun kana hate teh?
Sabab aya dzikir kana dzat, aya dzikir kana shifat, aya dzikir kana af'al jeung asma Alloh anu aya kaitanana jeung kajadian anu keur karandapan. Yen sakabeh kajadian anu keur karandapan ku diri rek amis atawa pait, rek matak ngeunah atawa teu ngeunah, eta kabeh buatan Alloh. Dihaja dijieun ku Alloh, diri teu ngabogaan kakuatan pikeun nolak eta kajadian. Nepika lat poho kana eta kajadian kalindih ku inget kanu ngadamel eta kajadian.

Ari carana pikeun nengtremkeun hate nyaeta :

1. Tumarima, lamun diri keur meunang cocoba utamana cocoba pait saperti diri gering, usaha rugi, tani teu hasil, aya anu nipu, kudu ditarimakeun ku diri yen ieu teh cocoba ti Alloh, diri keur dicoba ku Alloh.

2. Pasrah, saba'da tumarima yen ieu kajadian teh dihaja ku Alloh atuh diri teh kudu pasrah kana eta taqdir. Da sanajan hate adug lajer, usaha satekah polah supaya ulah keuna ku mushibat moal bisa. Diri teu boga kakuatan jeung kamampuan pikeun ngaleungitkeunna, iwalti kudu pasrah sumerah kanu Maha Kawasa anu ngadamelna.

Ku ngarasula jeung putus asa maol bisa kaluar tina eta taqdir, nu pasrah sumerah oge akur. Ngan bedana ari anu ngarasula kalah ka cape hate, ari anu pasrah sumerah tetep tentrem teu galider, da' yakin sagalana ti Alloh. Atuh hatena betah sanajan keur loba kasusah.

3. Neangan tarekah, saba'da tumarima jeung pasrah kana eta musibah kudu terus narekah kumaha carana sangkan diri bisa kaluar tina eta musibah, tapi lain narekah kupedah diri henteu pasrah. Lain diri teu narima kana musibat, narekah soteh pedah diparentah, lain rek ngalawan Alloh, tapi tarekah seja ibadah, ibadah narekahna. Kapan Alloh tos miwarang sangkan  manusa kudu narekah, bari tetep hate mah yakin yen sagala kajadian anu kaalaman ku diri buatan Alloh. Narekah lain kupedah henteu pasrah kana taqdir ngan ku Alloh diparentah. Kadar hasil jeung henteuna eta mah lain tujuan, atuh nu  bisa kaluar tina musibat nuhun, henteu oge teu nanaon.

Nabi Khidir sareng nabi Ilyas ayeuna masih aya keneh jumeneng teu acan pupus, duanana papendak di Mina atawa di 'Arafah atawa di Muzdalifah dina tiap taun dina nalika munggah Haji. Aranjeunna tara waka mulih tara waka papisah lamun tacan ngucapkeun opat kalimah ieu :

١. بِسْمِ اللهِ مَاشَاءَ اللهُ لاَ يَسُوْقُ الْخَيْرَ إِلاَّ اللهُ

Kalawan nyebat Alloh, kalawan parentah Alloh, kalawan pangersa Alloh, liwat Qudrot Irodatna, kuring didieu, taya tangan pangawasa, taya pangabisa, wungkul ku kersaning Alloh. Moal aya anu ngagiringkeun kana kahadean iwalti Alloh,. Maksudna diri hayang dijadikeun jalma hade ku Alloh, da diri mah teu daya teu upaya.

٢.  مَا شَاءَ اللهُ لَايَصْرِفُ السُّوْءَ إِلَّا اللهُ

Sadaya pangersa Alloh, moal aya anu bisa mengkolkeun kagorengan anging Alloh, kuring hirup rebuan taun, batur mah hirupna alanyar jeung ngan sakareudeung, kumargi kitu, naon nu matak goreng ka diri mugi pangmengkolkeun ku Gusti. Ka susah, katugenah jeung kagorengan mugi dileungitkeun ti diri abdi.

٣. مَا شَاءَ اللهُ وَ مَا بِكُمْ مِنْ نِّعْمَةٍ فَمِنَ اللهِ

Sadaya kajadian pangersa Alloh, sadaya ni'mat anu aya didiri abdi eta pamasihan Alloh. Suku bisa ngalengkah, panon bisa ningali, ceuli bisa ngadenge, otak masih keneh bisa dipake mikir, eta kabeh ni'mat anu aya didiri wungkul pamasihan Alloh. Lain kabisa diri, lain kamampuan diri pribadi, da tong boro anggota badan, dalah nyawa darma titipan Gusti.

٤.  مَا شَاءَ اللهُ لَا حَوْلَ وَ لاَ قُوَّةَ إِلاَّ بِاللهِ

Sadaya perkara pangersa Alloh, makhluq taya nu boga kakuatan, taya nu bisa nyiptakeun, taya nu bisa nanaon, bisa thoat jeung ibadah wungkul ku pitulung Gusti Alloh, diri bisa ngajauhan ma'siat jeung doraka oge ku kakawasaan Gusti, diri mah teu walakaya taya kabisa hirup ge dihirupkeun, usik diusikkeun, wungkul Gusti nu ngersakeun.

Ieu opat kalimah teh nandakeun kana kalalaian diri, yen diri teh teu walakaya. Hirup ngan darma wawayangan. Kumelendang di alam pawenangan teh ngan darma sandiwara, atuh sagala rupa ge kumaha sutradara nu ngaturna.

Lamun geus boga rasa yen diri teh laip, taya tangan pangwasa taya pangabisa, atuh nalika aya musibat teh   henteu matak jadi tugenah, teu matak jadi ngarasula jeung putus asa, da' eta kajadian teh ti Alloh, dihaja ku Alloh, tinggal balikeun deui ka Alloh anu ngadamelna jeung anu masihannana. Jadi hate teh salawasna betah jeung bisa tengtrem. saur Ibnu 'Abbas dawamkeun ieu du'a, baca tiap ba'da Shubuh jeung ba'da Maghrib tilu kali ;

بِسْمِ اللهِ مَاشَاءَ اللهُ لاَ يَسُوْقُ الْخَيْرَ إِلاَّ اللهُ.
 مَا شَاءَ اللهُ لَايَصْرِفُ السُّوْءَ إِلَّا اللهُ
مَا شَاءَ اللهُ وَمَا بِكُمْ مِنْ نِّعْمَةٍ فَمِنَ اللهِ.
 مَا شَاءَ اللهُ لَا حَوْلَ وَ لاَ قُوَّةَ إِلاَّ بِاللهِ