Kabutuhan Jasmani Sareng Kabutuhan Rohani Mana Anu Kudu Diutamakeun?

Ku Kh.Jaja Abdul Jabar
www.miftahul-huda.com


Makhluk Alloh anu ngaran manusa, diciptaken ku Alloh kabagi tina dua unsur :

1. Unsur jasmani

2. Unsur rohani

Masing-masing dina jasmani sinareng rohani ngabogaan kabutuh jeung kapentingan. Bagja kacida manusa anu kapentingan rohanina lewih dominan tibatan kepentingan jasmanina. Kacida rugina manusa nu kepentingan jasmanina ngelehken kapentingan rohanina.

Penjelasan

Manusa diciptakeun ku Alloh SWT. kabagi tina 2 unsur :

1. Unsur jasmani, sok diistilahkeun kusebutan “kurung” /cangkang.

2. Unsur rohani, sok diistilahkeun kusebutan “kuring” / inti, dzatiahna manusa. Pagna diistilahkeun “kuring”, sabab rohani ieu nu bakal nanggung jawab dipayuneun Alloh, tina sagala perkara nu geus karandapan di alam dunia.

Duanana, rek jasmani atanapi rohani ngabogaan kabutuh jeung kapentingan pikeun lumangsungna kahirupan. Kabutuh jeung kapentingan jasmani sifatna material, saperti dahareun, inumeun, tempat ngiuhan jeung sajabana. Nyakitu rohani boga kabutuh jeung kapentingan, anu gunana pikeun kakuatan rohani, saperti iman, taqwa, dzikrulloh (eling ka Alloh), amal ibadah jeung sajabana.

Dawuh Alloh SWT. dina surat Al-Qoshosh ayat 77 :

وَابْتَغِ فِيمَا آتَاكَ اللَّهُ الدَّارَ الآخِرَةَ وَلاَ تَنْسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلاَ تَبْغِ الْفَسَادَ فِي الأَرْضِ إِنَّ اللَّهَ لاَ يُحِبُّ الْمُفْسِدِين
َ
Jeung geura gunakeun saniskara anu geus dipaparinkeun ku Alloh ka anjeung pikeun (kahirupan) lembur akherat, sarta kahade ulah mohokeun anjeun kana bagian anjeun tina dunya. Jeung kudu nyieun kahadean saperti Alloh geus midamel kahadean ka anjeun. Jeung kahade ulah nimbulkeun karuksakan di ieu bumi, karna saestuna Alloh henteu mikacinta jalm-jalma anu nimbulkeun karuksakan.
Nu kudu leuwih dinomer hijikeun mah urusan akherat, da urusan dunia mah sakadar “La Tansa” ulah poho. Dina hartos, lamun hayang kabagjaan dunia akherat, mun hayang tenang hirup di dunia jeung di akherat, utamakeun piakherateun, utamakeun kabutuhan rohani.

Najan loba harta, kadudukan luhur, mun batin teu tenang mah euweuh hartina, bakal loba kasieun, loba katugenah, nyeri hate, pikiran ruwet. Tapi dimana hate jeung batin tenang, maka hirupna bakal tenang, reugreug. Sanajan hirup sagala seuseut, sagala teu boga, da kabutuh dohir mah ngan sakadar sapiring sangu jang minuhan beuteung, pakean sakadar tutup orat, imah jang ngiuhan.

Dawuh Alloh SWT. dina surat Ar-Ro’du : 28

الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوب
ُ
(nyaeta) jalma-jalma anu ariman jeung anu hatena ngarasa tengtrem lantaran eling ka Alloh. Sing inget ! ngan ku jalan eling ka Alloh, hate (manusa) jadi tengtrem.
Sabalikna, lamun kahirupan dunia leuwih ngelehkeun (ngadominasi) akherat, maka ancaman Alloh SWT. dina surat At-Takatsur 1-7.

Mudah-mudahan urang sadaya salamina tiasa kacumponan dina pangabutuh, utamina masing tiasa ngutamakeun kabutuhan rohani, kangge bekel kabagjaan di dunia sareng di akherat.