Manfa'at Du'a

بسم الله الرحمن الرحيم

{ وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ }

Hartosna: "Jeung dimana abdi Kami nanyakeun Kami, maka saenyana Kami eta anu deukeut, Kami anu bakal ngaijabah du'ana jalma anu ngadu'a. Maka maranehna kudu nyumponan (parentah Kami) jeung kudu iman ka Kami supaya manehna aya dina bener". (QS. al-Baqoroh : 186.

Alloh tos nganjurkeun ka sakumna ummat muslimin jeung mu'minin kudu ngadu'a, sabab du'a teh nandakeun  kana kayakinan diri yen teu aya makhluq anu bisa nyieun bukti, nandakeun yen diri teh teu walakaya jeung teu bisa nanaon. Du'a teh nandakeun kalaipan diri jeung pangakuan yen diri urang salawasna butuh ku Alloh.

Ari bentuk du'a eta aya dua :

1. Langsung nyuhunkeun ka Alloh. saperti make kecap “Allohumma”, “Robbana” jeung sajabana, saperti anu geus biasa dilakonan ku kalolobaan manusa, atawa ku wiridan ba'da Sholat.
2. Aya nu melalui tawassul/perantaraan. Ari nu bisa dipake tawassul eta aya tilu ; a) Maca Qur'an,
b) Sholat,
c) Amal hade.

Manfa'at du'a :
Ari manfa'atna du'a eta aya opat ;
1. Jadi ibadah, sakumaha pidawuh Rosul :  (الدُّعَاءُ مُخُّ اْلعِبَادَةِ ) "Ari du'a teh acina/Intisari na ibadah".
Jadi ari du'a teh salah sahiji bentuk ibadah mahdloh, ku ngadu'a jadi ibadah. Malah kasebut ibadah nu paling utama, sabab ari ibadah nu sejen mah tong boro anu ghoer mahdloh dalah ibadah anu mahdloh ge sok katarumpangan ku riya, takabbur jeung panyakit hate anu sejenna. Sedengkeun ari ngadu'a mah ku ngadu'ana ge nandakeun yen diri teh teu walakaya jeung teu bisa nyieun bukti. Atuh ngadu'a teh mangrupa ibadah anu pangikhlasna ti antara ibadah anu sejenna.
2. Taqorrub, ngadeukeutkeun diri ka Alloh, sakumaha dawuhan Alloh diluhur. Kulantaran Alloh teh deukeut atuh lamun urang ngadu'a teh beuki ngadeukeutan diri ka Alloh (taqorrub).
3. Jadi dzikir ka Alloh, sabab jalma anu keur ngadu'a ka Alloh pasti eling ka Alloh. Da teu aya manfa'atna ngadu'a bari goplah mah, jeung deui moal aya  jalma goflah nu hayang ngadu'a.
4. Bakal di ijabah.

Ari bentuk ijabah eta aya opat ;
a. ditaekkeun darajat payuneun Alloh,
b. jadi kifarat kana dosa,
c. disalametkeun tina balai,
d. dicumponan sakumaha pamentana.

Atuh lamun urang sering ngadu'a ka Alloh hayang dipasihan rizqi anu seueur tapi henteu bro wae, eta sanes teu di ijabah, tapi ijabahna dipengkolkeun ku Alloh kana salah sahijina anu tilu tadi. Ngadu'a mah hayang rizqi loba, tapi kulantaran dirina lamokot keneh ku dosa, maka eta du'a dipengkolkeun heula ku Alloh pikeun ngifaratan dosa, atawa salamet tina balai jeung musibat anu keuna ka dirina. Ijabah dua mah kumaha Alloh, kumaha saena mungguh Alloh, lain sakumaha kahayangna anu ngadu'a.

Syarat / Adab Ngadu'a :
Ari syaratna sangkan du'a urang diijabah ku Alloh aya lima ;
1. Kudu bersih jeung suci tina hadats,
2. Ngadu'a dina waktu jeung tempat ijabah,

Ari waktu ijabah nyaeta :
1)   Dina sapertilu peuting anu akhir.
2)   Dina malem jeung poe Juma'ah, terutama diantara khutbah dua nalika khutbah.
3)   Dina bulan Romadlon, terutama dina malem Lailatil Qodar,
Ari tempat ijabah diantarana ;
1)   Di masjid,
2)   Di handapeun Multazam,
3)   Di Raudloh,
4)   Di Maqom Ibrohim,
5)   Jeung sajabana,

3. Pakean anu dipake jeung dahareun anu didahar nalika ngadu'a kudu anu halal, ulah ladang haram,
4. Kudu ikhlas karna Alloh, ngadu'a karna ibadah lain kajurung ku butuh atawa hayang laksana sakumaha pamentana,
5. Anu dipentana kudu halal ulah haram.

Kulantaran ngadu'a teh dianjurkeun ku Alloh, atuh urang kudu mindeng ngadu'a. Ahli Sya’ir nyaurkeun :

لاَ تَسْأَلَنَّ بَنِيْ آٰدَمَ حَاجَةً # وَسَلِ الَّذِيْ أَبْوَابُهُ لاَ تُحْجَبُ
اَللهُ يَغْضَبُ إِنْ تَرَكْتَ سُؤَالَهُ # وَبَنِيْ آٰدَمَ حِيْنَ يُسْأَلُ يَغْضَبُ

“Anjeun ulah menta butuh ka anak Adam
Menta mah ka dzat nu pantona tara nutup
Alloh mikabendu kanu tara menta
Anak Adam mun dipenta ambek-ambekan”

Ngan ngadu'ana kudu ikhlas, malah alusna mah ngadu'a teh lain hayang hasil sakumaha pamenta, tapi seja ibadah ku ngadu'ana. Sabab lamun hayang hasil sakumaha pamentana sok eureun ngadu'ana lamun geus hasil, jeung jadi ngarasula oge putus asa lamun henteu hasil. Akhirna anu laksana kahayangna jadi eureun ngadu'ana, anu teu laksana ge eureun ngadu'ana sabab henteu di ijabah wae, sarta diakherat moal aya ganjaran ladang ngadu'ana, da ibadahna kakara Mubtadiin (diajar).


mutiarahikmah-uwakubaro.blogspot.in