Eling ka Alloh Swt

بسم الله الرحمن الرحيم

{ الَّذِينَ يَذْكُرُونَ اللهَ قِيَامًا وَقُعُودًا وَعَلَى جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَذَا بَاطِلًا سُبْحَانَكَ فَقِنَا عَذَابَ النَّارِ }

Hartina : Nyaeta jalma-jalma anu dzikir ka Alloh bari nangtung, bari diuk, bari nyanggigir, jeung tafakkur kana diciptakeunnana langit jeung bumi, (bari ngaromong) "duh pangeran abdi sadaya ! Gusti henteu midamel ieu kalawan batal, Maha suci Dzat Gusti, mugi Gusti ngajaga abdi sadaya tina siksa naraka.(QS. Ali-Imron : 191)

Usahakeun diri supaya dina sajero peuting ulah kosong tina eling ka Alloh, sabab numutkeun ahli Suluk, batas maksimal poho teh 24 jam, mun leuwih 24 jam bakal hese pisan pikeun dibawa eling deui.

Waktu, tempat, jeung laku lampah anu keur karandapan ku anjeun kudu dipake lapangan geusan eling ka pangeran, Dzat Anu Maha Agung. Dina sapoe sapeuting, lamun dicokot fardluna wungkul henteu jeung sunnatna, Sholat teh 17 roka'at, berarti 17 kali anjeun ngarengkuhkeun badan ruku' ka Alloh, 34 kali sapoe sapeuting anjeun sujud ka Alloh, jadi 51 kali sujud jeung ruku' nungkulkeun diri ka Alloh sapoe sapeuting, piraku eta Sholat rek henteu dipake eling ka Alloh. Lamun dina teu rek dipake eling ka Alloh, atuh rek iraha jeung waktu nu mana anu rek dipake eling?, kulantaran kitu cukupkeun diri eling dina Sholat, mahikeun Sholat pikeun eling ka Alloh.

Tapi ku polah syetan, ku godaan syetan, loba polah sujud tapi lain sujud, loba polah ruku' tapi lain ruku', kusabab kitu mu'minin moal bagja ku Sholatna tapi ku khusyu' dina Sholatna, sakumaha pidawuh Alloh :

{ قَدْ أَفْلَحَ الْمُؤْمِنُونَ، الَّذِينَ هُمْ فِي صَلَاتِهِمْ خَاشِعُونَ }

“Nyata bagja jalma mu'minin, tegesna jalmaanu khusyu’ dina Sholatna.” (QS. Al-Mu'minun : 1-2)

Jalma anu geus bisa khusyu’ dina Sholatna bakal bagja di dunya jeung di akheratna, bagja jasmanina tur bagja rohanina. Jalma anu henteu khusyu’ dina Sholatna moal meunang kabagjaan, paling-paling ukur nyuparkeun kawajiban, malah leuwih ti kitu di ancam ku Alloh.

{ فَوَيْلٌ لِلْمُصَلِّينَ، الَّذِينَ هُمْ عَنْ صَلَاتِهِمْ سَاهُونَ }

“Cilaka jalma anu Sholat, nyaeta Sholat anu poho dina keur Sholatna.” (QS. Al-Ma'un : 4-5)

Kusabab kitu kudu diusahakeun ti mimiti ayeuna, timimiti Sholat anu ieu, shloat urang kudu khusyu’, supaya dimaqbul, ditarima ku Alloh. Maka lamun Sholat hayang ditarima ku Alloh kudu ngusahakeun jeung narekahan, kumaha carana jeung kumaha syarat/adabna Sholat anu dimaqbul ?

Ari syaratna supaya di maqbul nyaeta :
1. Sholatna kudu rintih, ulah riweuh atawa gurung gusuh.
2. Pakean, badan jeung tempat Sholatna kudu suci jeung bersih, alusna bari make seuseungitan.
3. Dahareun anu didaharna kudu anu halal ulah tina ladang haram.
4. Kudu isti'dad / persiapan samemehna, minimal 10 menit samemeh Sholat badan kudu geus reureuh tina pagawean, jeung ngosongkeun hate  tina rereged dunya, sabab hate anu cape jeung badan anu pinuh ku rereged matak ngadorong kana teu khusyu'.
5. Wudluna kudu hade tur sampurna.
6. Tong lapar teuing tong wareg teuing.
7.  Sholatna kudu khusyu'.

Nujadi udagan tong jauh-jauh khusyu’ mubtadi'in we heula, nyaeta inget yen diri keur Sholat, inget yen diri keur madep ka Alloh. Lamun dina sajero 24 jam, dina 17 kali ruku' jeung 34 kali sujud henteu eling ka Alloh kudu  jadi tagihan, ulah waka sare lamun can kaqodloan eling dina keur Sholat. Saba'da Sholat baca istighfar, pikeun ngaistighfaran Sholat anu malaweung.

 Kubakat kudu-kuduna eling dina keur Sholat nepika ku ahli kabatinan mah dihartian Sholat teh cukup ku eling wungkul, padahal ieu teh salah.

Naha dzikir / eling teh ukur Sholat wungkul atawa Sholat bari kudu eling ? lain eling ngan ukur dina Sholat wungkul , da keur kumaha bae oge, dimana bae oge, diri wajib ngusahakeun sangkan eling. Terutama dina nalika Sholat, nyanghareup atuh hatena kudu milu nyanghareup, sakumaha dawuhan Alloh diluhur.

Maksud eta ayat, lain eling kudu bari nangtung, terus diuk terus nyanggigir dina satempat. Tapi dina keur nangtung, dina keur leumpang, keur gawe, rek dagang, rek tani, rek usaha, rek sare jeung sajabana kudu cicing dina لامطلوب alias kudu nincak dina tugas jeung parentah Alloh. mun reureuh oge kudu tetep nincak dina   .الصراط Sakumaha pidawuh Alloh :

{ فَإِذَا فَرَغْتَ فَانْصَبْ، وَإِلٰى رَبِّكَ فَارْغَبْ }

“ Lamun geus eureun tina hiji pagawean geura ancag deui dina pagawean sejen, jeung wungkul ka Alloh anjeun miharep.” (QS. Al Insyiroh)

Lamun mu'minin geus goflah, geus poho jeung tara eling ka Alloh, pasti bakal teuas hatena, lamun geus teuas hatena bakal jauh ti Alloh, lamun geus jauh ti Alloh bakal ka tungkul ku pagawean anu matak mawa kana goflah, anu akhirna bakal babari dirawu jeung digewang ku syetan, babari dipengkolkeun kana salah.


http://mutiarahikmah-uwakubaro.blogspot.in/2013/09/eling-ka-alloh-swt.html?m=1