Nadzom Fiqih Ku Basa Sunda

نظم فقه كو بهاسا سوندا

بسم الله الرحمٰن الرحيم

Ari puji nu sampurna eta tetep
Kagungan Allah nu kapershifat lengkep
Rohmat Allah mugi tetep sareng salam
Di jeng Nabi Muhammad mustika 'alam

Wa b'aduhu iyeu anu dinadzomkeun
Kitab fiqih ngarah resep ngarapalkeun
Mugi iyeu nadzom sing manfa'at geude
Ka nu ngaos ka lalaki ka awewe

FASHAL MERTELAKEUN CAI

Sakur cai bijil ti bumi ti langit
Meunang dipake susuci najan pait
Kaya ibun cilaut sumur wahangan
Hujan buah ciburial jeung cihujan

Anging lamun eta cai geus dipake
Miceun najis hadats leutik hadats geude
Maka eta suci tapi teu nyucikeun
Mun teu robah ku najis anu dipiceun

Deui cai robah sebab kacampuran
Barang suci kaya cai dientehan
Henteu jadi naon-naon cai robah
Sebab cicing atawa kayu di kulah

Ari cai saeutik mun kanajisan
Jadi najis najan teu robah teu naon
Sejen lamun cai geude kanajisan
Mun teu robah eta teu jadi halangan

Ari cai kapanasan mata poe
Eta makruh kana salira teu sae
Makruh soteh mun cai na masih panas
Dina wadah nu dipalu lian emas

Deui makruh cai kacida panas na
Cara makruh cai kacida tiis na
Ngaran cai saeutik nu henteu aya
Tila ratus puncul lima kati jawa

Lamun cukup beurat tilu ratus lima
Disebut na cai geude ku Ulama
Lamun wadah pasagi sa asta leuwih
Saparapat eta cai geude deuih

FASAL MERTELAKEUN NAJIS

Sakur 'ain bijil tina qubul dubur
Eta najis lian mani nu ditutur
Anjing babi arak bangke geutih nanah
Bulu bangke tulang ceker na jeung utah

Anging bangke jalma simeut lauk cai
Eta tilu rupa bangke tetep suci
Ari reuhak ciduh leho korong cileuh
Eta lain najis tapi barang geuleuh

Anggahota pisah tina sasatoan
Anu hirup hukum bangke sato hewan
Anging bulu sato hewan nu didahar
Jeung ciduh na kesang kasturi teu samar

FASAL NGABERSIHKEUN ANU NAJIS

Suci lamun jadi cuka eta arak
Ku sorangan najan dipoe ngagolak
Ari ngumbah najis anjing sareng babi
Tujuh kali make taneuh nu sakali

Ari najis salian anjing jeung babi
Lamun leungit 'ain cukup ku sakali
Tapi utama na ngumbah tilu kali
Najan najis leungit ku ngumbah mimiti

Ari kulit bangke lian anjing babi
Ku disamak eta kulit jadi suci
Ari nanah cenang bisul geutih raheut
Dihampura mun saeutik dina sholat

Deui dihampura najis leutik pisan
Teu katingal ku tingali pertengahan
Ari ci kiih budak lalaki anu
Acan umur dua taun ti ngajuru

Sareng acan barang dahar lian susu
Cukup dikepretan cai tempat itu
Ari najis hukum cukup ku sakali
Ngaliwatkeun cai kana tempat tadi

FASAL MERTELAKEUN FARDHU WUDHU

Fardhu wudhu aya genep sadayana #
Hiji niat kadua ngumbah beungeut na
Tilu ngumbah leungeun dua jeung sikut na #
Opat ngusap saeutik tina sirah na

Lima ngumbah dua suku neupi kana #
Mumuncangan tartib rukun ka genepna

FASAL MERTELAKEUN NU NGABATHALKEUN KANA WUDHU

Opat rupa ngabatalkeun kana wudhu #
Coba bilang ku maneh ulah kaliru
Hiji nu kaluar ti salasahiji #
Qubul dubur naon bae lian mani

Kaduana leungit akal sebal edan #
Sebab weureu sare sakalor jeung ayan
Angin jalma sare nu rapet birit na #
Kana tempat diuk teu batal wudhuna

Katiluna paantel kulit awewe #
Jeung lalaki duanana pada geude
Batal soteh antel jeung lain mahrom na #
Serta teu make hahalang antarana

Ka opatna nyabak qubul sareng dubur #
Bangsa jalma ku dampal leungeun dilager

FASAL MERTELAKEUN FARDHU ADUS (mandi)

Fardhu adus aya dua masing awas #
Hiji niat dina hate masing awas
Dua ngaratakeun cai kana badan #
Anu dzhohir sareng buuk walatraan

FASAL ANU NGAWAJIBKEUN KANA ADUS

Ari syarat wudhu sareng syarat mandi #
Eta aya sapuluh teu kirang deui
Hiji islam dua tamyiz tilu suci #
Tina nifas sareng hedh mungguh di istri

Opat ulah aya barang any nyegah #
Datang cai kana kulit kaya geutah
Lima ulah aya barang nu ngarobah #
Kana cai dina tempat nu dikumbah

Genep nyaho kana kafardhuanana #
tujuh ulah neqodkeun sunnah ngumbahna
Kadalapan cai na anu nyucikeun #
sareng anu dua deui ditangtukeun

Di jalma nu langgeng hadats eta tangtu #
hiji tuluy-tuluy dua manjing waktu

FASAL MERTELAKEUN PAHARAMAN KA JALMA BOGA HADTS LEUTIK HADATS GEUDE

Saha jalma batal wudhu maka haram #
opat rupa hiji sholat coba faham
Dua thowaf katiluna nyabak qurãn #
njan tulisan sa ayat dina papan

Opat mawa qurãn anging diweunangan #
dina barang ulah niat mawa qurãn
Haram ka jalma nu junub genep rupa #
ari anu opat tadi jangan lupa

Lima cicing di masjid anging di pipir #
genep maca qurãan anging niat dzikir
Ari paharaman sabab hedh jeung nifas #
sapuluh genep nu tadi jangan was-was

Tujuh puasa jeung tholaq ka dalapan #
ari ngaliwat ka masjid ka salapan
Haram liwat lamun geutih sieun ngecret #
ukur makruh lamun aman urat aret

Sapuluh dialap suka antarana #
tuur bujal najan teu aya syahwatna

FASAL MERTELAKEUN HAIDH JEUNG NIFAS

Ari kadar haidh anu pang saeutikna #
kadar sapoe sapeuting kaluarna
Ari gholibna genep atawa tujuh #
najan kaluarna geutih henteu puguh

Lima belas dinten jaman pang seueurna #
najan sajam unggal dinten kaluarna
Suci antara dua hedh saeutikna #
lima belas dinten sinareng wengina

Ari dua puluh tilu atanapi #
dua puluh opat gholibna di istri
Ari seueurna suci teu dianggeran #
sok aya istri saumur teu kotoran

Lamun datang haidh sanggeus manjing waktu #
anu mahi keur sholat nu boga waktu
Halna tacan sholat dina waktu eta #
maka wajib qodho sholat nu harita

Lamun leungit man'i maka wajib mandi #
najan tacan nepi kana gholib suci
Lamun waktu aya keneh terus sholat #
mun teu aya terus qodho kade lepat

Najan eta waktu sholat ngan sakadar #
zaman takbirotul ihrom teu ditilar
Serta wàjib qodho anu samemehna #
sholat waktu anu meunang dijam'ana

Kaya suci waktu 'isya sareng 'ashar #
maka wajib qodho maghrib sareng dzuhur
Ari salian ti eta kaya suci #
waktu subuh qodho subuh bae hiji

Ari saeutikna kàdar zaman nifas #
eta sakecretan geutih henteu teras
Ari gholib nifas opat puluh dinten #
pang seueurna zaman genep puluh dinten

FASAL MERTELAKEUN SYARAT WAJIB SHOLAT

Syarat wajib sholat genep masing apal #
Hiji islam dua baligh tilu 'aqal
Opat boga rungu kalima ningali #
Genep kadatangan pangajak ti Nabi

FASAL MERTELAKEUN SYARAT SAH SHOLAT

Syarat sah na sholat dalapan perkara #
Hiji kudu suci tina hadats dua
Dua suci tina najis dina badan #
Dina tempat sareng dina papakean

Tilu nutup 'aurot opat madep qiblat #
Lima kudu geus manjing waktuna sholat
Genep nyaho kana kafardhuanana #
Tujuh ulah neqodkeun sunnah fardhuna

Kadalapan ngajauhan sakabehna #
Nu ngabatalkeun kana sholatna

FASAL MERTELAKEUN HADATS

Ari hadats leutik mana-mana barang #
Anu ngabatalkeun kana wudhu urang
Ari anu ngawajibkeun kana mandi #
Hadats gede jumlah dua sareng tadi

FASAL MERTELAKEUN 'AUROT

Ari 'aurot lalaki antara tuur
Sareng bujal keur sholat nalika udar
Ari 'aurot awewe anu dibeuli
Dina sholatna 'aurot cara lalaki

'Aurot awewe merdeka dina sholat
Kabeh badan salian leungeun beungeut
Ari luar sholat jeung lalaki sejen
Kabeh badan najan kuku pangeureutan

Ari sareng mahrom sareng pada istri
Antara tuur reujeung bujal hey ki santri
Ari sareng carogena henteu aya
Anu 'Aurot sumangga sadaya-daya

FASAL MERTELAKEUN RUKUN SHOLAT

Rukun sholat tujuh belas hiji niat
Dina hate neja fardhu eta sholat
Dua takbirotul ihrom nu katilu
Nangtung ka jalma nu kawasa dina fardhu

Opat maca fatihah kalima ruku'
Genep thumaninah dina waktu ruku'
Tujuh i'itidal dalapan thumaninah
Dina eta i'itidalna masing rineh

Kasalapan sujud dua kasapuluh
Dina eta sujud dua thumaninah
Kasabelas diuk dina antarana
Sujud dua rukun kadua belasna

Thumaninah dina diuk anu tadi
Tilu belas tahiyyat anu pandeuri
Opat belas diuk tahiyyat pandeuri
Lima belas maca sholawat ka Nabi

Genep belas aweh salam nu mimiti
Tujuh belas tartib dina rukun tadi

FASAL MERTELAKEUN NIAT

Ari niat eta neja hate urang
Babarengan sareng prakna gawe barang
Ari pangkat niat eta aya tilu
Hiji niat lamun dina sholat fardhu

Maka wajib qoshdu t'ayin sareng fardhu
Kaya ngucap usholli fardhol maghribi
Lamun sholat dina anu ngabogaan
Waktu sareng sebab wajib qoshdu t'ayin

Lamun dina sunah muthlaq maka wajib
Qoshdu wungkul jabi ti eta teu wajib

FASAL MERTELAKEUN TAKBIROTUL IHROM

Syarat takbirotul ihrom eta aya
Genep belas syarat teu kengeng teu aya
Hiji prakna kudu sanggeus nantung bener
Lamun sholat fardhu sareng taya 'udzur

Dua kudu basa arab lamun bisa
Tilu kudu lafadz الله nu kawasa
Opat kudu lafadz Akbar kalimana
Kudu tartib eta lafadz duanana

Genep ulah panjang hamzah lafadz الله
"Ba" na lafadz Akbar ulah panjang nu katujuh
Kadalapan "Ba" na ulah ditasydidan
Ulah tambah Wawu eta kasalapan

Antara dua kalimah dua kasapuluh
Ulah nambah Wawu memeh lafadz الله
Kasabelas ulah eureun antarana
Kalimah الله sareng lafadz Akbar na

Dua belas sadayana huruf takbir
Sing kadangu ku awak nu boga takbir
Tilu belas kudu sanggeus manjing waktu
Lamun dina sholat nu diwaktu-waktu

Opat belas prakna takbir dina tingkah
Sanggeus urang nyanghareup ka baitulloh
Lima belas ulah ngaruksak aksara
Atawa patukeur deui jeung aksara

Genep belas ari takbirna mamum
Eta kudu pandeurieun takbir imam

FASAL MERTELAKEUN SYARAT FATIHAH

Syarat fatihah sapuluh sadayana
Hiji tartib tuluy-tuluy kaduana
Katiluna ngaraksa huruf fatihah
Opat ngaraksa tasydidna ulah salah

Kalimana ulah repeh anu lila
Genep ulah repeh anu henteu lila
Anu neja megatkeun bacaanana
Tujuh kudu maca sadaya ayatna

Kadalapan ulah ngarobah aksara
Sareng baris anu matak robah m'ana
Kasalapan macana fatihah kudu
Sanggeus nangtung lamun dina sholat fardhu

Sareng maca sakabeh huruf fatihah
Sing kadenge ku awakna kasapuluh
Sareng ulah kaselang ku dzikir lian
Anging amiin imam anu ngamimitian

FASAL MERTELAKEUN TASYDIDNA FATIHAH

Opat belas eta tasydidna fatihah
Hiji luhureun lam na lafadaz bismillah
Dua tilu luhureun ro rohman rohim
Opat luhureun lam na lillaahil 'adzim

Lima luhureun ba na robbil 'alamin
Genep tujuh dina ro na rohman rohim
Luhureun dal yaumiddin kadalapan
Dina iyyaaka n'abudu kasalapan

Dina iyyaaka nasta'in sapuluhna
Dina shirothol mustaqim sabelasna
Opat belas diluhureun lafadz dhollin
Ari ngaji ulah kagembang ku ulin

FASAL MERTELAKEUN SYARAT SUJUD

Ari syarat sujud eta aya tujuh
Hiji sujud dina anggahota tujuh
Hiji tarang sareng dampal suku dua
Tuur dua sareng dampal leungeun dua

Kaduana tarang ulah katutupan
Tilu sabeuratna sirah tong ditahan
Kaopatna pangturun na ulah aya
Maksud sejen salian ti sujud tea

Lima ulah sujud kana hiji barang
Anu tepung nu gedag milu jeung urang
Genep birit kudu luhur batan sirah
Katujuhna syarat sujud thumaninah

FASAL MERTELAKEUN TASYDIDNA TAHIYYAT

Ari tasydidna tahiyyat nu sampurna
Eta dua puluh hiji sadayana
Ari tasydidna at-tahiyyat eta
Dina luhureun "ya" sareng luhureun "ta"

Sareng luhureun shodna ash-sholawatu
Luhureun "tho" sareng "ya" ath-thoyyibaatu
Lillahi tasydidna dina luhureun lam
Luhureun sin ari dina as-salam

'Alaika ayyuhannabiyyu tasydidna
Luhureun ya enun sareng ya akhirna
Wa rohmatullohi eta luhureun lam
Luhureun sin wa barokatuhus-salam

Sareng luhureun lam na 'ibadillahis-
Sholihina luhureun shod ya akhi
An-laa ilaaha ( ان لآ الٰه ) di luhureun lam alif
Illallohu ( الا الله ) dina lam sareng lam alif

Anna Muhammadar rosulullohi
Luhureun nun emim ro laamillahi


Fasal mertelakeun waktu sholat
فصل مرتيلاكن وقت صلاة

Maka wajib dimana geus manjing waktu
Gawe sholat atawa niat nu tangtu
Rek migawe sholat dina jero waktu
Jadi dosa lamun urang henteu kitu

Ari mimitina aya waktu dzuhur
Eta lingsir mata poe anu luhur
Ari akhirna lamun kalangkang urang
Enggeus sarua sareng adegan urang

Ari seep waktu dzuhur maka dongkap
Waktu 'Ashar hingga mata poe surup
Awal maghrib eta surup mata poe
Hingga surup mega beureum anu sae

Seep maghrib dongkap deui waktu 'isya
Hingga surup mega beureum nu biasa
Seep 'isya dongkap deui waktu subuh
Hingga bijil mata poe anu teguh

فصل مرتيلاكن وقت انو حرام دي فاكي صلاة

Haram sholat dina jero lima waktu
Lamun henteu aya sebab anu tangtu
Hiji waktu mata poe keur bijilna
Sahingga sakadar satumbak luhurna

Dua waktu tengah-tengah langit pisan
Salian jum'at hingga mengok ka kulon
Ka tiluna rek surup layung nu sae
Hingga surup pisan eta mata poe

Opat b'ada sholat subuh ka limana
B'ada sholat 'ashar eta sampurnana
Ari sholat qodho mah taya pamengan
Dina waktu mana najan pasosonten

فصل مرتيلاكن ركن انو كود طمأنينة

Ari rukun anu kudu thumaninah
Eta opat, hiji ruk'u ulah salah
Ka duana i'itidal ka tilu dina
Sujud opat dina diuk antarana

فصل مرتيلاكن انو عابطلكن كان صلاة

Ari anu ngabatalkeun kana sholat
Opat belas, hiji hadats kade lepat
Dua katibanan najin mun teu terus
Diragragkeun tina badan serta mulus

Tilu kabuka 'aurat mun teu ditutup
Buru-buru, opat ngucap dua huruf
Atawa hiji huruf aya hartian
Kaya ngucap samaksud ngagenihan

Batal deui ku ngadehem anging lamun
Aya 'udzur ngunikeun nu jadi rukun
Kalimana ngahaja migawe barang
Nu matak batal kana puasa urang

Kagenepna dahar seueur najan lali
Tujuh tilu kali usik nuli-nuli
Kadalapan luncat sareng sabangsana
Kasalapan neunggeul tarik jeung mitsilna

Kasapuluh nambah rukun anu bangsa
Pagawean tur ngahaja teu kapaksa
Kasabelas miheulaan ka imamna
Dua rukun bangsa pagaweanana

Atawa mandeurikeun maneh ti imam
Anging 'udzur teu bisa nuturkeun imam
Dua belas niat megatkeun sholatna
Katilu belas gantung pegat sholatna

Opat belas mider-mider rek megatkeun
Kana sholatna mana nu ditetepkeun

فصل مرتيلاكن سنة ابعاض

Ari sunnah ab'adh tujuh sadayana
Hiji tahiyyat awwal, dua lungguhna
Maca sholawat ka Nabi katiluna
Dina jero tahiyyah anu awwalna

Sholawat kaula wargana kaopatna
Dina jero tahiyyat nu pandeurina
Lima maca qunut dina saban dinten
Genep qunut witir saparo romadhon

Tujuh maca sholawat ka Kangjeng Nabi
Dina qunut ka sohabat Kangjeng Nabi

فصل مرتيلاكن بيلاعن ركعات صلاة نو لما وقت جع ليانا

Dina sapoe sapeuting roka'atna
Sholat fardlu tujuh belas sajumlahna
Sareng tilu puluh sujud langkung opat
Jeung salapan puluh takbir langkung opat

Jeung sapuluh salam tahiyyat salapan
Saratus lima puluh tilu tasbehan
Ari rukun dina lima waktu sholat
Dua ratus tilu puluh punjul opat

Ari dzuhur, 'ashar, 'isya bangsa opat
Rukun hiji waktu lima puluh opat
Margi hiji rokaatna dua belas
Rukun anu bulak-balik masing awas

Tambah genep niat takbirotul ihrom
Lungguh akhir tahiyyat sholawat salam

فصل مرتيلاكن كَوَاسَ٢نَا دينا صلاة

Saha nu teu kawasa kana nangtung
Maka sholat bari diuk sami untung
Lamun teu kawasa diuk maka sholat
Bari ngedeng nyangigir nyanghareup kiblat

Teu kawasa nyangigir nangkarak sholat
Serta kedah ganjel sareng nunjang kiblat
Apes keneh maka sholat ku isyarah
Sareng niat masing lempeng dina manah

Teu kawasa ku isyarah tuluy jalankeun
Rukun sholat dina hate dijentrekeun
Henteu dihampura jalma tinggal sholat
Satungtung akalna bener masih inget

فصل مٓرتيلاكٓن روفا ٢ نو دِتعكلكٓن دينا صلاة

Tilu rupa ditinggalkeun dina sholat
Hiji fardlu dua sunnah jeung haiat
Lamun ninggal hiji fardlu najan lali
Eta henteu katambal ku sujud sahwi

Lamun deukeut keneh wajib balik deui
Kana fardlu make tambah sujud sahwi
Ari sunnah entong balik sanggeus urang
Gawe fardlu tapi sujud nambal kurang

Ari sunnah haiat henteu kitu kiyeu
Entong sujud entong balik kanu biyeu
Saha anu mang-mang dina rokaatna
Kudu nyokot bilangan pangsaeutikna

Pami subuh asa dua asa hiji
Wajib nambah serta sunnah sujud sahwi

فصل مٓرتيلاكٓن فامكروهان صلاة

Seueur pisan pamakruhan dina sholat
Sawarehna ngalieuk teu aya hajat
Kaya ngalieuk barangna bisi leungit
Serta makruh keur sholat nenggak ka langit

Malihan dawuhan mutawali
Ngalieuk teh haram sareng hulaimi
Sareng numutkeun qoulna syekh adzro'i
Tanggah ka luhurge haram cara tadi

Makruh deui ku panon mere isyarat
Atawa ku biwir lamun taya hajat
Sareng bedas dina tempat anu kendor
Sareng sabalikna lamun taya 'udzur

Sareng makruh nulak cangkeng taya 'udzur
Margi eta kalakuan nu takabbur
Sareng makruh sholat gancang purat-perot
Rukun oge ampir aya nu kaliwat

Sareng makruh peureum mun inggis cilaka
Henteu makruh mun teu inggis aya bahla
Tapi lamun aya gambar dina tempat
Pangsholatan eta peureum jadi sunnat

Dina ruku dina sujud makruh deui
Rapet beuteung kana pingping dilalaki
Sareng ngarapetkeun peupeuteuyanana
Dina gigir dina ruku jeung sujudna

Sareng makruh lungguh cara anjing diuk
Sareng sujud cara gaok macok lauk
Sujud cara singa depa eta makruh
Sareng dina ruku handap teuing sirah

Sareng makruh manjangkeun tahiyyat awwal
Salian mamum kajeun sholawat ka al (keluarga nabi)
Sareng makruh nyorokkeun ramo leungeun na
Jeung nguyupuk laer teuing disampingna

Sareng makruh nyiduh ka hareupeunana
Jeung katuhu henteu makruh ka kencana
Lamun nyiduh di masjid sing ati-ati
Bisi ngecret kana tempat anu suci

Sareng makruh nekenkeun sabeulah suku
Dina nangtung kenca atawa katuhu
Sareng makruh sholat bari nahan hadats
Kiih ngising atanapi nahan bobos

Sareng makruh mun geus hadir kadaharan
Sareng lapar jeung makruh bubudugulan
Sareng makruh make beubeur dina cangkeng
Anging lamun dipake mageuhan samping

باب الصيام

Wajib kanu islam saban-saban taun
Tur mukallaf puasa bulan romadlon
Jadi jumlah syarat wajib shiyam opat
Hiji islam, aqal, baligh sareng kuat

Ari fardlu sareng rukun shiyam opat
Ari rukun kahiji nyaeta niat
Kaduana nangtukeun niat puasa
Saban peuting poe isuk rek puasa

Rek nekanan puasa fardlu romadlon
Atawa nekanan anu dinadzarkeun
Katilu nanahan tina dahar leueut
Tina jima tina utah kade lepat

Opat nyaho mimiti jeung panungtungan
Ulah niat jeung buka satabrang-tabrang
Anu ngabatalkeun puasa sapuluh
Masing apal ngarah jadi jalma teguh

Hiji 'ain anu nepi kana beuteung
Najan leutik sarta dihaja ku urang
Atawa kajero tikoro jeung sirah
Henteu batal neureuy ciduh nu beresih

Jeung teu batal asup 'ain kana beuteung
Teu dihaja atawa dipaksa orang
Jeung teu batal kebul pangayakan tipung
Jeung katalanjuran cai kana irung

Lamun henteu banget dina kekemuna
Sareng ngingsreuk cai kajero irungna
Dua huqnah hartina ngasupken ubar
Tina salasahijina qubul dubur

Atawa ngasupkeun tungtung ramo kana
Qubul dubur dina waktu istinjana
Dina qodlo hajat sareng istinjana
Masing bisa pisan urang ngaraksana

باب الحج

Diwajibkeun munggah haji ka baitulloh
Dina saumur sakali kanu mampuh
Maka lamun sanggeus mampuh pot umurna
Maka jadi wajib dihajikeunana

Ari rukun haji lima kade salah
Hiji ihrom kadua wuquf di 'arfah
Rukun katiluna thowaf di baitulloh
Opat sa'i antara shofa jeung marwah

Kalima ngagunting atawa dicukur
Tina rambut sirahna sing loba syukur
Iyeu lima salian wuquf di 'arfah
Tinggal opat jadi rukun tina 'umroh

Iyeu rukun-rukun haji jeung 'umrohna
Eta aya syaratna sareng fardluna
Maka wajib sadayana dihartoakeun
Ku sugerning anu bade ngalampahkeun

Sareng haram kanu ihrom seuseungitan
Sareng haram sirah jenggot diminyakan
Miceun kuku miceun buuk sareng jim'a
'Akad nikah sareng muqoddamah jim'a

Sareng moro boboroan tanah darat
Nu didahar henteu haram sato laut
Sareng haram lalaki nutup sirahna
Sareng haram ka istri nutup rarayna

Sareng sarung tangan sareng haram deui
Anu nyarung kaya gamis di lalaki
Maka saha nu migawe paharaman
Maka dosa jeung wajib dikifaratan

Ari jim'a jaba haram ngaruksakeun
Kana haji sareng wajib diqodloan
Sareng wajib dina taun sab'adana
Sareng wajib kifarot geude ngarana

Sareng wajib ihrom haji sareng umroh
Tina miqot sareng nginep muzdalifah
Sareng nginep di mina sareng ngabalang
Jumrotul 'aqobah poenan rayagung

Sareng ngabalang jumroh tiluanana
Dina poe tasyriq jeung thowaf wad'ana
Sareng haram boboroan tanah haram
Sareng jujukutanana kanu ihrom

Sareng kanu henteu ihrom oge haram
Jukutna jeung boboroan tanah haram
Sareng tambah mun ganggu di tanah mekah
Kana boroan jeung jukut wajib fidyah

Lamun urang rek migawe hiji barang
Wajibkeun ilmuna heula masing terang
Sabab gusti Alloh  ngawajibkeunana
Eta pasti ngawengku syarat rukun na

Sareng wajib marentah sareng mernahkeun
Ka jalma nu ninggal syarat sareng rukun
Lamun teu jadi fitnah wajib maksana
Lamun mantak fitnah wajib ngainkarna

Sareng disyaratkeun sadayana amal
Kedah ikhlas kerna Alloh 'Azza wa Jal
Sareng kadaharan urang kedah halal
Sareng panganggona mun teu kitu gagal

Sareng wajib sadayana ngaraksa
Anggahota urang tina lampah dosa
Margi agama teh dua kalakuan
Hiji tho'at dua nyinggahan cegahan

Sakieu ge ilmu fiqih atos cekap
Pikeun jalma ibadahna rada handap
Sapertos jisim abdi anu dlo'if
Anu pamendakna sakalangkung la'if

______________________

Mugi-mugi Gusti Allah ngahampura
Ka guru sim abdi nu mulih ngumbara
Samulihna ti dunya ka rohmatillah
Mugi dijembarkeun tempatna nu indah
Khususna mah kanu kagungan karangan
Ajengan Juwaini ibni 'Abdirrohman