Isro M'iroj

بسم الله الرحمن الرحيم

سُبْحَانَ الَّذِي أَسْرٰى بِعَبْدِهِ لَيْلًا مِنَ الْمَسْجِدِ الْحَرَامِ إِلٰى الْمَسْجِدِ الْأَقْصٰى الَّذِي بَارَكْنَا حَوْلَهُ لِنُرِيَهُ مِنْ آٰيَاتِنَا إِنَّهُ هُوَ السَّمِيعُ الْبَصِيرُ

Hartosna: “Maha Suci Dzat anu ngaleumpangkeun abdina dina waktu peuting ti Masjidil Harom ka Masjidil Aqsho anu di sakurilingna pinuh ku barokah, sabab Kami rek ningalikeun kana tanda-tanda (kakawasaan) Kami,. Saestuna Alloh eta dzat anu ngadangu tur anu ningali”. (QS. Al-Isro' ayat 1).

Ari percaya kana kajadian Isro Mi'roj ka asup kana 'Aqidah Sam'iyyat. Ari 'Aqidah Sam'iyyat nyaeta perkara anu wajib diteqadkeunnana ku sabab pasti buktina da' geus didawuhkeun ku Al Quran jeung Al-Hadits. Lamun jalma ragu-ragu atawa mangmang komo lamun teu percaya kana Isro Mi'raj maka batal 'Aqidah Sam'iyyatna. Lamun batal 'aqidah Sam'iyyatna maka batal imanna.

Ari Isro nyaeta leumpang ti Masjidil Harom di Mekkah ka Masjidil Aqsho di Palestina. Ari Mi'roj mah nyaeta ngapung ngawang-ngawang ngambah jomantara naek ka langit nincak alam Nashut, alam Malakut, alam Jabarut jeung alam Lahut.
Diluar Isro Mi'roj Alloh ngameunangkeun manusa jeung jin pikeun nembus langit, sakumaha dawuhannana dina surat Ar-Rohman 33 :

 يَا مَعْشَرَ الْجِنِّ وَالْإِنْسِ إِنِ اسْتَطَعْتُمْ أَنْ تَنْفُذُوا مِنْ أَقْطَارِ السَّمَاوَاتِ وَالْأَرْضِ فَانْفُذُوالَا تَنْفُذُونَ إِلَّا بِسُلْطَانٍ

Hartosna : "He, golongan jin jeung manusa! lamun aranjeun kaduga kana nembus atsmosfhir langit jeung bumi, pek geura tembus ku aranjeun, tapi aranjeun moal bisa nembus kana eta atmoshfir kajaba kudu make eta kakawasaan". (QS. Ar-Rohman : 33.)

Ari Sulthon / kakawasaan hisi anu bisa dipake nembus langit nyaeta : 1.Kakawasaan anu gede,  2. Pangarti anu loba, 3. Modal anu gede, 4.Wawanen anu leber.
Ari Sulthon Ma'ani nyaeta: 1.Mu'jizat, 2.Karomat, 3. Ma'unat, 4.Istridraj.

Intipati anu dicandak ku Rosululloh SAW, anu jadi bekel pikeun naek ka langit saba'da di operasi, di piceun tempat syetan tina manahna teras dikumbah ku cai zamzam, lajeng dieusian ku :
·      Iman, anu sabenerna iman (Haqiqotul Haqiqoh),
·      Islam anu kuat,
·      Mental sobar jeung hilim,
·      Ilmu anu nyagara,
·      Kayakinan anu kuat dina nyekel agama.

Urang salaku umatna moal bisa Mi'roj haqeqi nepika ka alam Lahut saperti Nabi, ngan lamun Mi'roj ma'ani (naekkeun tingkat jeung darajat dipayuneun Alloh ) bisa, nyaeta ku jalan anu lima, ngan ari Nabi mah langsung pamasihan langsung ti Alloh. Ari urang mah kudu ngusahakeun diri sorangan, nyatana :
1.    Kudu bisa ningkatkeun kana iman, minimal iman Ilmu yaqin. Ari jalan ngami'rajkeun / naekkeun iman nyaeta aya tilu :
a.    Muqorrobah, nyaeta ngahias diri ku amal hade. Ari carana Muqorrobah aya lima ;
1) Maca Qur'an bari mikir-mikir kana eusina lamun ngarti, lamun teu  ngarti yakinkeun yen nu dibaca eta Kalam Alloh.
2) Beuteung ulah wareg teuing, ulah kosong teuing, sarta ulah di eusian ku barang anu haram.
3) Sholat Tahujjud tengah peuting.
4) Mindeng masamoan jeung jalma-jalma anu saroleh.

b.  'Uzlah, nyaeta ngasingkeun diri ti makhluq, rek 'uzlah Bidayah nyaeta ngajauhkeun diri ti makhluq nu sejen seja ngawungkulkeun diri ibadah ka Alloh, atawa 'uzlah Nihayah nyaeta awak mah tetep campur gaul jeung batur, tapi hate teu tagiwur, tetep reureujeungan jeung Alloh nu Maha Ghofur.

c. Tafakkur kana lima perkara ;
1)   Tafakkur kana maot,
2)   Tafakkur kana ni'mat jeung siksa kubur,
3)   Tafakkur kana Surga jeung Naraka,
4)   Tafakkur kana Sama' jeung Bashorna Alloh,
5)   Tafakkur kana tapak Qudrotna Alloh.

2.  Islam anu kuat.
Ari islam nyaeta :

"وَضْعٌ إِلٰهِيٌّ سَائِقٌ لِذَوِى الْعُقُوْلِ السَّلِيْمَةِ بِاخْتِيَارِهِمِ الْمَحْمُوْدِ إِلٰى مَا يَصْلُحُ مَعَادَهُمْ وَمَعَاشَهُمْ ".

Hartosna : “Aturan Alloh anu ngagiring ka manusa anu boga akal sampurna kalayan ku pamilihna anu alus, anu bisa nepikeun kana jalan pisalameteun dunya akherat”

3.  Ngabogaan mental shobar jeung hilim atawa bijaksana, tegesna leuleus jeujeur liat tali, landung kandungan laer aisan tara getas harupateun.

4.  kudu boga ilmu anu loba. Hingga teu aya poe anu kaliwat tanpa nambahan ilmu, teu boga rasa diri geus pinter, sabab nu boga rasa geus pinter eta ciri jalma bodo, malah beuki tambah ilmuna kudu beuki tambah rasa bodona (saperti pare beuki ngeusi beuki tungkul). Geuning Rosululloh anu sakitu luhur elmu penemuna jembar panalarna tur digayuh ku Alloh masih keneh diparentah ngadu'a:
وَقُلْ رَبِّ زِدْنِي عِلْمًا
 سورة طه ١١٤
“Ucapkeun ku anjeun (Rosul) mugi Gusti nambihan elmu ka abdi.”

5.  Kayakinan nyekel agama anu kuat. Henteu unggut kalinduan henteu gedag kaanginan, henteu runtuh ku diasongan tahta, henteu leeh ku dibibita ku harta jeung wanita.

       Ieu mental anu lima dimentalan/dibungkus ku polah anu opat. Nyaeta :
1)   Shidiq, sanggup bener keur diri sorangan, bener dina tekad, bener dina niat jeung bener dina polah, henteu neangan kana meunang ngelehkeun bener.
2)   Amanah, kapercaya dina nyekel agama anu dititpkeun ku Alloh kamanehna.
3)   Tabligh, sanggup nepikeun jeung ngada'wahkeun agama anu nyampak dina dirina.
4)   Fathonah, pinter dina sagala bidang, pinter nempatkeun diri dina shirot anu kudu dileumpangan, pinter dina nangtungkeun hujjah agama.

Lamun jalma geus bisa ngusahakeun jeung nerapkeun mental anu lima sarta dimantelan kunu opat, tangtu imanna bakal naek nepika alam Lahut. Bisa Muhadloroh jeung Alloh saperti Kanjeng Nabi sarta bakal meunang pangkat Wali Alloh.