Jenis Amal Numutkeun Ulama Tasawuf

KH. Sholeh Nasihin
miftahul-huda.com

Ari amal mungguh ulama tasawuf eta kabagi 3 :

1. Amal Syari’ah, fungsina pikeun nyalametkeun anggota badan tina dosa. Bisa timbul/hasil ku 3 jalan :

- Tobat
- Taqwa
- Istiqomah

2. Amal Thoriqoh, fungsina pikeun nyalametkeun amal tina riya. Bisa hasil ku 3 jalan :

- Ikhlas dina amal
- Sidqu saba’da amal
- Tuma’ninah/ tenang hate nalika keur amal.

3. Amal Haqiqoh, fungsina pikeun nyalametkeun rahasia-rahasia hate dina amal. Bisa hasil ku 3 perkara :

- Muroqobah
- Musyahadah
- Ma’rifat

Penjelasan

Ngaran amal secara lughowi/bahasa nyaeta حَرْكَةُ الْجِسْمِ hartosna gerak anggota badan. Gerakna anggota badan digolongkeun kana 2 bagian :

1. Lamun sesuai menepati kana aturan syara’ eta ngarana to’at.

اِنْ وَفَقَ عَلَى شَرْعِيَّةٍ يُسَمّى طَاعَةً
Saperti sholat, lamun menepati kana aturan syara’ (menepati syarat, rukun jeung ngajauhan pangbatalan), maka eta dingaranan to’at.

2. Lamun teu sesuai kana ketentuan syara’ maka dingaranan maksiat,

اِنْ لَمْ يُوَافِقْ عَلَى شَرْعِيَّةٍ يُسَمَّى مَعْصِيَّةً
Sekalipun bentuk dohirna to’at, tapi teu sesuai jeung ketentuan syara’ maka tetep we ngaranna maksiat (ninggalkeun to’at), sabab teu dianggap sah dipigawena.

Ditingal tina fan Tasawuf, Ulama nyaurkeun : اَلْأَعْمَالُ عَلَى ثَلَاثَةِ اَقْسَامٍ, amal teh kabagi 3 bagian.

1. Fungsi amal syari’ah, tegesna bisa hasil kasalametkeunna anggota badan tina dosa ku 3 jalan :

a. Tobat, sing loba istigfar. Malah fungsina istighfar disamping ngalebur dosa, oge saur katerangan hikmahna tobat/istighfar teh matak ngadatangkeun rizqi (barokah).

الإِسْتِغْفَارُ سَبَبٌ لِكَثْرَةِ الرِّزْقِ
b. Taqwa, ari ngaran taqwa teh ngalaksanakeun sagala parentah Alloh ninggalkeun sagala nu dilarang-Na.

c. Istiqomah, hartina nyaeta angger dina kataqwaan. Sagala tempat anu kasorang, waktu nu karandapan teu dipake maksiat. Malah lamun tea mah teu kahaja tisoledat kana dosa tuluy langsung tobat, maka eta teu gugur pangkat istiqomahna. Malah lamun jalma anu geus istiqomah dina ibadah berarti eta jalma geus dipasihan karomah (kamulyaan) ku Alloh SWT. Al istiqomatu ainul karomah.

2. Amal Thoriqoh, fungsina pikeun ngahasilkeun alus hate. Ari thoriqoh nyaeta nyekel pageuh (apik) kana agama. Bujeng-bujeng dina ibadah fardu, dina pasunatan ge dijaga kalawan apik. Malah saur keterangan dina kitab Al-Hikam nu hartosna, “Sababiyah ayana ma’rifat teh ku ngajaga pasunatan”. Tapi lamun jalma ninggalkeun kafarduan ngutamakeun pasunatan, eta tanda nuturkeun hawa nafsu. Tegesna fardlu kudu dijaga (pokok eta mah), tuluy pasunatan ulah ditinggalkeun. Dimana-mana jalma getol dina pasunatan saba’da geus bisa ngariksa kana fardlu, maka bakal dibere kama’rifatan, wushul (tepi hate) ka Alloh. Fungsi/faidah amal thoriqoh nyaeta pikeun bersihna hate, ku jalan :

a. Ikhlas dina amal, seja bakti ka Alloh SWT. Munculna ikhlas teh dina saba’da sering jeung geus terbiasa migawe amal (istiqomah) sarta nyekel pageuh kana ka apikan ibadah.

b. Shidqu, ari shidqu teh ruh tina ikhlas. Ikhlas mah dipigawe nalika prakna amal, ari shidqu mah saba’da amal. Ulah boga perasaan bisa amal teh tina kemampuan sorangan, tapi kudu ditekadkeun urang bisa amal teh pedah meunang pitulung ti Alloh.

c. Tenang hate/tuma’ninah, betah dina ibadah. Ulah soteh ibadah neangan betah, tapi usahakeun sabisa-bisa nalika ibadah kudu sing karasa betah.

Mudah-mudahan urang sadayana tiasa ngajalankeun syare’at ditambah ku thoriqoh, amal bener tur ikhlas sahingga ditarima ku Alloh SWT. Amin Yaa Robbal Alamin.

Catatan redaktur :
Dina penjelasan diluhur mung dijelaskeun dua poin, mudah-mudahan dina sanes waktos tiasa diserat penjelasan anu patali sareng materina. Neda maklumna, hatur nuhun.