Amanat Kangjeng Rosulullah Saw, Pikeun Umatna

Oleh: KH. Khoeruman Azam
www.miftahul-huda.com

Pidawuh Kangjeng Rosululloh Saw. ka salasawios Shohabat, nyaeta Abi Dzar Al-Ghifari, nu mana mangrupakeun amanat khususna pikeun Abi Dzar umumna pikeun sakabeh umat.

Dawuh Anjeunna :

1. جَدِّدِ السَّفِيْنَةَ فَإِنَّ الْبَحْرَعَمِيْقٌ
Weuteuhkeun parahu anjeun, da saestuna lautan eta nu kacida jerona.
2. وَاسْتَكْثِرِ الزَّادَ فَإِنَّ السَّفَرَ بَعِيْدٌ
Lobakeun bebekelan anjeun, saestuna perjalanan eta kacida jauhna.
3. وَخَفِّفِ الْحَمْلَ فَإِنَّ الْعَقَبَةَ كَؤُوْدٌ
Hampangkeun babawaan anjeun, saestuna tanjakan eta kacida nanjeurna.
4. أَخْلِصِ الْعَمَلَ فَإِنَّ النَّاقِدَ البَصِيْرُ
Ikhlaskeun amal anjeun, saestuna anu Neuteup eta nu Maha Waspada.

 Penjelasan

Opat rupi amanat ti kangjeng Rosululloh Saw. mangrupikeun bentuk kanyaah ti Anjeunna ka umat, pikeun bekel kasalametan, kamuliaan di dunia jeung di akherat.

1. جَدِّدِ السَّفِيْنَةَ فَإِنَّ الْبَحْرَعَمِيْقٌ
Weuteuhkeun parahu, saestuna lautan eta anu kacida jerona.
Maksadna nyaeta urang sing bisa terus boga jiwa semangat, pantang layu (menyerah). Semangat hayang aya dina Ridlona Alloh, semangat hayang meunang kani’matan Rohmat Alloh di dunia jeung akherat. Dina hal ieu, kasumangetan mangrupikeun motor penggerak diri anu bakal ngabentuk kayakinan jeung buleudna tekad (prinsip).

Kunaon urang kudu terus miboga kasumangetan? Sabab, lautan teh kacida jerona.

Diri urang lir ibarat keur ngangkleung di lautan, lamun nalika berlayar parahuna teu weuteuh/kokoh, bisa-bisa titeuleum, moal bisa tepi ka tujuan. Numawi kudu ngupayakeun diri sangkan salamet tina terjangan ombak jeung tiupan angin, ulah nepi tikerelep. Teu aya deui carana iwal ti parahu nu jadi kendaraan urang kudu salilana weuteuh, semangat urang kudu salilana weuteuh/kokoh. Kudu aya dorongan kasumangetan dina jiwa, kudu boga prinsip Man jadda wajada, ulah boga prinsip anu lemah. Ku kituna urang kudu ngupayakeun diri sangkan terus semangat, sabab kasumangetan mangrupikeun modal utama pikeun ngaraih kasuksesan di dunia jeung di akherat.

2. وَاسْتَكْثِرِ الزَّادَ فَإِنَّ السَّفَرَ بَعِيْدٌ
Kudu loba bebekelan, saestuna lalakon perjalanan teh kacida jauhna.
Perjalanan manusa masih keneh jauh, ayeuna urang teh keur ngalalakon di alam dunia (keur ngaliwat) menuju ka lembur padumukan/pangbalikan anu abadi. Tah dina waktu ayeuna nu keur karandapan mangrupakeun masa pikeun ngalobakeun bekel jang engke di akherat. Mulia, bagja, cilaka, sangsara gumantung kumaha bebekelan ayeuna di dunia. Bekel anu kudu disiapkeun nyaeta amal, to’at ka Gusti Alloh jeung eureunan maksiat. Urang kudu bisa ningali dina setiap bentuk waktu nu datang ka diri, lamun aya parentah Alloh maka buru-buru lakokan bisi tinggaleun, tapi lamun bentukna larangan Alloh maka geuwat ngahindar tina eta larangan Alloh, bisi kalakonan.
Dawuh Kangjeng Rosul Saw.

قال رسول الله صلى الله عليه وسلم : يَا ابْنَ آدَمَ اَطِعْ رَبَّكَ تُسَمَّى عَاقِلًا، وَلَا تَعْصِيْهِ فَتُسَمَّى جَاهِلًا. (رواه أبو نعيم عن أبي هُرَيْرَةَ)
“Hai anak Adam, kudu bisa to’at aranjeun ka Pangeran aranjeun, maka (nalika bisa to’at) aranjeun bakal disebut jalma nu berakal. Jeung ulah ma’siat aranjeung ka Pangeran aranjeun, maka (nalika ma’siat) aranjeun disebut jalma nu barodo”. HR. Abu Nuaim, katampi ti Abi Hurairah Ra.
Mumpung aya keneh kesempatan pikeun to’at ka Alloh, sabab rek ngadago waktu nu mana pikeun to’at ka Alloh ari lain dina waktu ayeuna. Lamun urang geus bisa to’at ka Alloh maka saur Rosul urang meunang predikat hamba nu berakal.

Ari jalma nu berakal/jenius mah lain jalma nu bisa ngarancang logam jadi kendaraan, lain jalma nu ahli ilmu pengetahuan anu bisa ngahasilkeun karya dina bidangna. Tapi anu disebut pinter jeung boga akal menurut Rosulloh nyaeta jalma anu bisa to’at ka Alloh. Ari teu bisa to’at ka Alloh mah sanajan pinter dibidang-bidang sejen ge tetep disebut jalma bodo.

Upami dileunyepan, memang kaharti yen hamba nu to’at ka Alloh eta jalma anu pinter. Teu sapati-pati manehannana to’at, iwal ti boga pandangan jauh kahareup, yen dina masa nu bakal datang nyaeta masa anu abadi tempat kahirupan nu saenyana (akherat), numana ditangtukeunnana antara senang/bahagia anu abadi jeung siksa/kanalangsaan nu abadi. Numawi lamun ngaharepkeun kasenangan nu abadi teu aya deui jalanna iwal ti to’at.

Maka eta jalma daek cape dina waktu nu sakeudeung (di dunia) ngalaksanakeun to’at ka Pangeran jeung daek ngupayakeun diri ngalawan hawa nafsu, sabab manehannana boga prinsip hayang kasenangan anu abadi (di akherat). Tapi sabalikna, lamun jalma daek ma’siat disebut jalma anu teu boga akal (bodo) sabab teu boga pandangan jauh ka hareup, seolah-olah prinsipna nu penting senang ayeuna di dunia masalah akherat mah kumaha engke.

3. وَخَفِّفِ الْحَمْلَ فَإِنَّ الْعَقَبَةَ كَؤُوْدٌ
Hampangkeun babawaan, sabab tanjakan eta nu kacida nanjeurna.
Maksudna, ulah loba teuing (perkara dunia) nu narapel dina hate anu matak nganganggu kana amal, nu matak ngahalangan dina eling ka Alloh SWT. sing inget tanjakan kahirupan kacida nanjeurna, loba keneh ku kudu diliwatan.

4. أَخْلِصِ الْعَمَلَ فَإِنَّ النَّاقِدَ البَصِيْرُ
Ikhlaskeun amal anjeun, saestuna anu Neuteup eta nu Maha Waspada.
Supaya karya amal urang ditampi ku Alloh SWT, maka kudu ikhlas dina amal. Ulah aya unsur nu sejen, tapi kudu murni ibadah karena Alloh. Ikrarkeun dina hate, bila perlu tuturkeun ku lisan :

لَا مَعْبُوْدَ اِلَّا الله
"Yaa Alloh, abdi midamel ieu amal seja ibadah ka Gusti, seja tumut kana piwarang Gusti, teu aya nu diharapkeun iwal ti ridlo-Na Gusti.
Koreksi dina amal bisi aya amal-amal nu kacampuran ku riya, anu motifna dunia lain akherat geuwat sing ngarasa sieun teu jadi pahala di akherat. Mumpung aya keneh aya kesempatan, supaya sakabeh amal kapanggih pahalana di akherat, maka ikhlaskeun eta amal (boh nu geus kaliwat, atawa nu bakal dipigawe).

Mudah-mudahan urang sadaya kenging taufiq hidayah sareng inayah (pitulung ti Alloh SWT), sahingga tiasa jadi hamba nu dipikaridlo ku Anjeunna. Amin Yaa Robbal Alamin.





 Kamis, 26 Februari 2015 07:00 WIB
 Oleh  KH. Khoeruman Azam


Alamat: Pondok Pesantren Miftahul Huda
Manonjaya, Kab. Tasikmalaya - Jabar - ID - 46197
Telp. : 0265 - 380945
Fax. : 0265 - 380945
Po. Box 1 - Manonjaya 46197
Email: sekretariat.mh@gmail.com
info@miftahul-huda.com